唔係從事啲咩藝術創作，我哋先需要靈感嘅。喺日常生活中做好多事，包括處理文件、覆email，甚至今晚食咩好，或多或少都需要一啲靈感，否則會做得好勉強，或者落咗一個唔係太情願嘅決定，甚至根本完全唔知點做好。
遇到思維阻塞時，勉強做落去，唔會有咩好結果，最好停一停，做下其他事，唔好迫自己去係咁諗解決方法，過一陣，你就會有靈感了。呢個係好常見嘅現象。點解呢？因為雖然我哋手上暫停咗嗰樣工作，但潛意識仲會繼續將資料整合，當整合到差唔多可以解決問題時，我哋就會叮一聲，好似靈機一觸咁。
就好似面對愛情難題一樣，一日到黑無語問蒼天，或者死纏住朋友唔放，不斷重複你嘅愛情疑惑，最後唔單止會無結果，仲會將朋友嚇走。你應該做嘅係唔好諗住一定要解決到件事，到有一日瞓醒，你自然會知道自己應該點做，豁然開朗。咁樣唔係上天終於俾你啟示，而係潛意識幫你搵到答案。
全站熱搜
留言列表
