即使唔係speed dating，識朋友都好講first impression，女仔同女仔，就話有無數個化妝扮靚嘅話題可以傾，一同男生相處，好多女生就會啞口無言，唔知點應對，又驚唔啱channel，究竟應該點同新相識嘅男生打開話題呢？
1. Be Positve
好多女生傾偈嘅時候最愛吐苦水，覺得講出自己工作/生活之中嘅不忿事，就可以將自己同人哋嘅距離拉近。其實咁反而會令人哋覺得你思想好負面，唔會想同你傾落去。相反，對話輕鬆啲，散發多啲正能量，咁先會令人覺得同你一齊好舒服，鍾意同你相處
2. Be Yourself
唔好以為對住男仔，講晒佢哋鍾意嘅高達、Diablo等等就實無死。如果你本身對呢啲嘢無興趣又一竅不通，但又扮知好多，人哋同你講多兩句都知你扮專家，心底肯定覺得你「作狀」。
其實，做返自己先係最自然。想「投其所好」，不如試吓講啲大路嘅話題，由日常生活去到近期熱門電影，搵出大家都感興趣嘅topic，自然打開話題，又或者不經意將自己特別嘅一面講出嚟：「我學咗10年芭蕾舞」、「我年年都有參加馬拉松」令佢對你有興趣，吸引佢主動問落去，又可以令佢留下深刻印象，比夾硬勉強自己好得多。
3. Be a layman
可能你係電影愛好者，但係如果你第一次見面就一輪嘴講經典電影《大國民》幾有前瞻性、黑澤明嘅《羅生門》對人性嘅刻劃有幾深入，除非佢係電影大師，否則都只會俾你嚇親。可能你係想展現你特別嘅一面，令佢留下深刻印象，但咁反而會適得其反，令佢覺得你個人太高姿態好難溝通。
無論係咩話題都好，最緊要簡單易明，如果一開始已經都同你溝通唔到，又點會想同你做朋友？
4. Don’t BiLiBlahLa
女生鍾意講嘢，男生就最驚人長氣。所以兩個人初次交談，最忌「有你講、無佢講」。無論你講到幾興起都好，記得講慢少少（男生普遍覺得講嘢太快嘅女生太強悍、唔夠溫柔），中間要俾位佢回應，亦都要留心聆聽，一來一往嘅對話，先係正常架嘛！
5. Don’t investigate
好多女生如果spot到心儀嘅男生，都好想知道多啲關於佢嘅事，開場白講完叫咩名、做咩工作之後，可能就會不期然越問越多，咁樣對方可能會覺得你似「查家宅」，好煩，又或者以為你只想「釣金龜」多過想同佢做個朋友。
其實想知對方更多可以唔使咁刻意，試吓旁敲側擊，例如你想知佢係咪單身，你可以試吓話「你返工又咁忙，又要分時間陪女朋友，咪好辛苦？」等佢主動話你知，好過單刀直入問佢咁odd。同埋，話晒都係第一次見，無必要只係諗住搵個男友，當識多個朋友都無壞架，right？
留言列表
